PASQYRË E ULËT E VEZËVE: SI TË MERRNI ME ATO?

Zhgënjimi që ndieni kur përpiqeni të mbeteni shtatzënë, por kjo nuk ndodh, mund të jetë jashtëzakonisht dëshpërues, deri në dërrmues. Nuk jeni e sigurt se çfarë po ndodh, por e dini se duhet të ketë ndonjë arsye pse nuk arrini të mbeteni shtatzënë. Nëse po përpiqeni aktivisht të mbeteni shtatzënë prej një viti (gjashtë muajsh nëse jeni mbi 35 vjeç) pa rezultat, ka ardhur koha të vizitoni një specialist të fertilitetit dhe të zbuloni arsyen pse thjesht nuk po arrini të mbeteni shtatzënë.

Ekzistojnë lloj-lloj arsyesh për infertilitetin dhe diagnoza juaj përcakton llojin e trajtimit që nevojitet. Disa gra përballen me një gjendje që quhet rezervë e ulët e vezëve ose rezervë ovariale e pakësuar. Kjo gjendje shfaqet kur vezoret tuaja prodhojnë shumë pak vezë ose vezë që nuk janë të afta për fekondim. Kjo gjendje ndikon ndjeshëm në mundësitë tuaja për një shtatzëni të shëndetshme.

Çfarë është rezerva e ulët e vezëve?

Një grua lind me të gjitha vezët që do të ketë ndonjëherë (rreth një milion!) dhe deri në pubertet rezerva arrin rreth 300.000 vezë. Gjatë moshës riprodhuese, gratë ovulojnë rreth 300 deri 400 vezë. Me kalimin e moshës, rezerva e vezëve të afta fillon të pakësohet. Kjo është arsyeja pse shtatzënia bëhet më e vështirë sa më shumë i afroheni menopauzës. Nga gratë që kërkojnë trajtim fertiliteti, midis 20%-50% marrin diagnozën e rezervës së ulët të vezëve. Plakja ul numrin e vezëve që keni, por ka edhe faktorë të tjerë që ndikojnë në rezervën e vezëve dhe në fertilitetin tuaj. Këta janë:

• Endometrioza
• Kimioterapia
• Radioterapia
• Sëmundjet e tubave të Fallopit
• Ndërhyrje kirurgjikale e mëparshme në vezore
• Infeksioni i legenit
• Çrregullimet autoimune
• Menopauza e parakohshme
• Disa anomali gjenetike
• Duhanpirja
• Shytat (parotiti)
• Rezerva ovariale e pakësuar me shkak të pashpjegueshëm

Simptomat e rezervës së ulët të vezëve

Zakonisht, shenja e parë që mund të keni rezervë të ulët të vezëve është pamundësia për të mbetur shtatzënë. Megjithatë, në disa raste ka edhe simptoma të tjera disi të paqarta, si:

• Amenorrea (mungesa e një ose më shumë menstruacioneve që nuk lidhet me shtatzëninë)
• Cikle menstruale të shkurtra (më pak se 21 ditë)
• Menstruacione të rënda
• Aborti spontan

Nëse keni ndonjërën nga këto simptoma dhe nuk keni arritur të mbeteni shtatzënë pas 12 muajsh marrëdhëniesh pa mbrojtje (gjashtë muaj nëse jeni mbi 35 vjeç), është e rëndësishme t'i drejtoheni një specialisti të riprodhimit.

Si diagnostikohet kjo gjendje?

Nëse keni ndonjërën nga simptomat e mësipërme, në kombinim me moshën tuaj, stilin tuaj të jetesës dhe pamundësinë për të mbetur shtatzënë pas përpjekjeve gjashtë deri 12-mujore, mjeku mund të dyshojë për rezervë të ulët të vezëve. Ka disa mënyra të ndryshme për të diagnostikuar rezervën e ulët të vezëve. Në ditën e tretë, ose rreth ditës së tretë të ciklit tuaj menstrual, mjeku ju merr gjak për të matur nivelet e hormoneve, konkretisht nivelet e hormonit stimulues të folikulave (FSH)/estradiolit dhe të hormonit anti-Mülerian (AMH). Këto hormone janë të domosdoshme për një ovulim normal dhe të shëndetshëm. Ato që kanë FSH më të lartë dhe AMH më të ulët se normalja ka shumë gjasa të kenë rezervë të ulët të vezëve. AMH pasqyron numrin e vezëve në trup. Mjeku juaj i vlerëson këto nivele hormonesh, së bashku me një ekografi transvaginale për të vëzhguar numrin e folikulave të dukshme, përpara se të vendosë një diagnozë të saktë.

Trajtimi i rezervës së ulët të vezëve

Nëse mjeku juaj konstaton se keni rezervë të ulët të vezëve, nuk ka pse të dëshpëroheni. Ekzistojnë opsione trajtimi, në varësi të shkallës së rezervës suaj të vezëve.

Për ato që janë në kufi me rezervë të pakësuar të vezëve, fekondimi in vitro konvencional ofron suksesin më të madh. Ato që kanë pasur disa trajtime të pasuksesshme me fekondim in vitro për shkak të përgjigjes së dobët, ose gratë me rezervë shumë të ulët të vezëve, mund të përfitojnë nga protokolli mini-IVF.

Ato që kanë rezervë shumë të ulët të vezëve janë kandidate të shkëlqyera për fekondim in vitro me vezë dhuruese. Vezët e dhuruara janë të shëndetshme, zakonisht nga një grua më e re. Dhuruesit kontrollohen dhe si dhuruesja, ashtu edhe marrësja mbeten anonime. Disa njerëz përdorin vezë të shëndetshme të dhuruara nga një mike e ngushtë ose një pjesëtare e familjes. Zgjedhja për të përdorur vezë të shëndetshme dhuruese rrit suksesin e fekondimit in vitro për ato që kanë rezervë të ulët të vezëve.

Çfarë mund të bëni

Për ata që shqetësohen për rezervën e ulët të vezëve, gjëja më e mirë që mund të bëni është të siguroheni se jeni sa më të shëndetshëm. Lini duhanin dhe shmangni alkoolin dhe substancat e tjera të dëmshme. Ndiqni një ushqyerje të ekuilibruar dhe ruani një peshë të shëndetshme. Sigurohuni që të bëni ndonjë formë aktiviteti fizik të miratuar nga mjeku dhe të merrni suplemente të miratuara nga mjeku.

Edhe pse diagnoza e rezervës së ulët të vezëve është, në vetvete, shkak ankthi, gjeni mënyra të shëndetshme për ta përballuar stresin. Dilni në natyrë, bëni meditim, ndiqni orë joge dhe merrni parasysh mundësinë ta diskutoni diagnozën me një terapist të specializuar.

Në Qendrën e Mjekësisë Riprodhuese "Dr. Alexandros Traianos" e kuptojmë ankthin që lidhet me infertilitetin dhe jemi këtu për t'ju ndihmuar të gjeni përgjigje për këtë gjendje shumë personale. Me mjete shumë bashkëkohore dhe me një ekip me përvojë shkencëtarësh të specializuar në mjekësinë riprodhuese, Qendra jonë është gati t'ju ndihmojë ta zgjeroni familjen tuaj.